Ayon kay Wu Qiaoxi at AFP | 2025-10-09

Inanunsyo ng China ang bagong mga kontrol sa pag-export ng mga rare earth , na pinalawak ang mga kinakailangang lisensya para sa mga kaugnay na teknolohiya at kumpanyang nasa labas ng China, bilang hakbang upang "pangalagaan ang pambansang seguridad at interes.”

Ang mga hakbang na ipinatupad noong Oktubre 9 ay nagbabawal sa hindi awtorisadong pag-export ng mga teknolohiyang may kaugnayan sa rare earth na pagmimina, pagproseso, at paggawa ng magnet. Saklaw din nito ang mga teknolohiyang ginagamit sa “pag-aassemble, pagsasaayos, pagpapanatili, pagkukumpuni, at pag-upgrade ng mga linya ng produksyon,” ayon sa Ministry of Commerce. Agad na ipinatupad ang mga kontrol na ito at pinalawig ang mga kinakailangang lisensya para sa rare earth magnets na ipinatupad noong Abril .

Nais kontrolin ang teknolohiya

Ang China ang nangungunang bansa sa buong mundo sa produksyon ng mahahalagang mineral na ginagamit sa paggawa ng mga magnet na mahalaga sa industriya ng sasakyan, electronics, at depensa. Mula pa noong Abril, para sa ilang uri ng rare earth materials, hinihingi na ng Beijing ang mga lisensya para sa pag-export, na nagdudulot ng pagkaantala sa mga supply chain ng pandaigdigang pagmamanupaktura.

Ang pinakabagong hakbang ay itinuturing na isang “malaking upgrade” sa rehimen ng kontrol ng Beijing sa pag-export ng rare earth, na pinalawak ang saklaw mula sa mga raw material patungo sa teknolohiya at intellectual property.

“Ang mga restriksiyong ito ay ... lalo pang magpapalalim sa pagdepende ng mga dayuhan sa kaalaman ng China,” ayon kay Wang Dan, China director ng risk consultancy na Eurasia Group, sa ulat ng South China Morning Post.

Dagdag pa rito, sinabi ng Ministry of Commerce na ang mga dayuhang entidad na nag-e-export ng mga rare earth material na gawa sa China ay kinakailangang mag-apply ngayon ng export permit para sa dual-use item, na epektibo kaagad. Ang mga produktong rare earth na ginawa sa ibang bansa ngunit gumagamit ng mga elemento o teknolohiyang nagmula sa China ay sasailalim din sa mga restriksyon, na magkakabisa sa Disyembre 1.

Noong Oktubre 9, tumugon ang isang tagapagsalita ng Ministry of Commerce sa tanong ng isang mamamahayag sa pagsabing, “Sa loob ng ilang panahon, may mga organisasyon at indibidwal sa ibang bansa na direktang o hindi direktang naglipat ng mga kontroladong rare earth item na nagmula sa China ... para gamitin sa mga sensitibong larangan gaya ng militar. Ang mga aksyong ito ay nagdulot ng malaking pinsala o nagbanta sa pambansang seguridad at interes ng China ...”

Ang opisyal na pagsisiyasat ay nagiging mas mahigpit

Kailangang kumuha ng pahintulot ang mga exporter para sa mga teknolohiyang ginagamit sa pagmimina at smelting ng rare earth, pati na rin sa iba pang hakbang ng pagproseso, ayon sa ministry.

Susuriin ng mga opisyal ang mga aplikasyon na may kaugnayan sa pananaliksik at pagpapaunlad o paggawa ng ilang uri ng semiconductors at mga teknolohiyang artificial intelligence na may mga potensyal na aplikasyong militar sa case-by-case na batayan.

Dapat nilang tanggihan ang lahat ng mga aplikasyon para sa pag-export sa mga gumagamit ng militar sa ibang bansa.

Nananatiling hindi malinaw kung paano ipapatupad ng Beijing ang mga kontrol sa mga kumpanyang nag-ooperate sa labas ng China.

Maaaring hadlangan ng bagong anunsiyo ang mga inisyatiba ng ilang bansa na naglalayong palakasin ang sariling produksyon o bumuo ng mga pakikipag-ugnayan upang mabawasan ang pagdepende sa supply chain ng China.

Inanunsyo ng China ang mga hakbang habang muling nagsimula ang negosyo matapos ang isang linggong pambansang holiday at ilang linggo bago ang Asia-Pacific Economic Cooperation summit sa South Korea. Inaasahang magkikita ang mga pinuno ng China at United States sa gilid ng summit, kung saan malamang na tampok sa mga talakayan ang mga rare earth.

Mga patent ng China, pagdepende ng ibang bansa

Ang pandaigdigang rare earth deposits ay humigit-kumulang 110 milyong tonelada, kabilang ang 44 milyon sa China, sinabi ng US Geological Survey noong 2024.

Tinatayang may 22 milyong tonelada ang Brazil, 21 milyon ang Vietnam, 10 milyon ang Russia, at 7 milyon ang India.

Sa loob ng mga dekada, malaki ang ipinuhunan ng Beijing sa mga operasyon ng pagpoproseso, ngunit hindi nito ipinapatupad ang mahigpit na pangangalaga sa kapaligiran na hinihingi sa mga bansa sa Kanluran.

Naghain ito ng napakaraming patent kaugnay sa produksyon ng rare earth, na humahadlang sa mga dayuhang karibal. Bilang resulta, maraming kumpanya ang patuloy na nagpapadala ng kanilang ore sa China para pinuhin.

Ang mga ipinatupad na paghihigpit ngayong taon ay nakaapekto sa mga industriya sa buong mundo, kung saan napilitan ang ilang kumpanya na itigil ang produksyon dahil sa kakulangan ng suplay.

Matapos ang isang summit sa Beijing noong Hulyo, sinabi ni European Commission President Ursula von der Leyen na nagkasundo ang mga lider na pahusayin ang mekanismo sa pamamahala ng pag-export ng mga rare earth mula China patungong European Union. Gayunpaman, nahihirapan pa rin ang mga kumpanyang European sa pagkuha ng mga rare earth, ayon sa isang samahan ng mga negosyante noong Setyembre.

Estratehikong hakbang ng Australia

Upang kontrahin ang pangingibabaw ng China sa mga rare earth supply chain, ang Australia ay nag-anunsyo ng mga planong magbenta ng mga stake sa isang bagong 1.2 bilyong AUD ($791.5 milyon) na Critical Minerals Strategic Reserve sa mga kaalyadong bansa. Ang mga kaalyado tulad ng United Kingdom, United States, at France ay iniimbitahan na mag-co-invest para sa priority access sa mga kritikal na mineral na mahalaga sa malinis na enerhiya, electronics at depensa, ayon sa Rare Earth Exchanges.

Itong estratehikong reserve ay isang pangunahing hakbang sa pag-secure ng mga mahalagang supply chain.

Layon nitong patatagin ang presyo, pasiglahin ang upstream na paglago at ilipat ang mga demokrasya mula sa pira-pirasong pagsisikap tungo sa pinag-ugnay na seguridad sa yaman.

Ang Australia ang nangungunang tagagawa ng lithium sa buong mundo noong 2014.at may pangalawang pinakamalaking reserba ng cobalt at nickel. Nag-aalok ito sa mga kaalyado ng isang maaasahang alternatibo sa kontrol ng China sa 85% ng pagpoproseso ng rare earth.

Ang mga pangako sa pinagsamang pondo at garantisadong pangangailangan ay maaaring makabawas sa panganib na dulot ng mga isyung geopolitikal at problema sa suplay.