Ayon kay Joyce Huang | 2026-06-24

Sinusuri ng Taiwan ang mga hakbang upang higpitan ang kontrol sa pagluwas ng mga artificial intelligence (AI) chip patungo sa Tsina, ayon kay Minister of Economic Affairs Kung Ming-hsin.

Sinabi ni Kung sa isang sesyon ng lehislatura noong Hunyo 17 na sinimulan na ng kanyang ministeryo ang pagbalangkas ng mga legal amendment upang magpataw ng mas mahigpit na pagbabawal sa AI chip patungo sa Tsina, bilang tugon sa mga alalahanin tungkol sa ilegal na paglilipat ng mga Nvidia AI chip sa Tsina sa pamamagitan ng Taiwan.

Nakikipag-ugnayan ang kanyang ministeryo sa maraming ahensya, kabilang ang mga lupon ng pambansang seguridad at mga regulator ng pananalapi, kalakalan at customs bago tapusin at ipatupad ang mga pagbabago "sa lalong madaling panahon," aniya.

Maaaring pahintulutan ng mga iminumungkahing pagbabago ang Taiwan na litisin ang pagpupuslit ng AI chip patungo sa Tsina bilang isang krimen sa unang pagkakataon.

Kaso ng Nvidia server

Naglabas ng komento ang ministro matapos magpahayag ng pagkabahala ang mambabatas ng Democratic Progressive Party (DPP) na si Chung Chia-pin tungkol sa mga ulat na ang higanteng kumpanya ng teknolohiya ng U.S. na Super Micro Computer Inc. ay umano'y sangkot sa ilegal na paglilipat ng mga Nvidia AI chip patungo sa Tsina.

Hawak ng DPP ang pagkapangulo ngunit mayroon lamang itong minorya sa parlamento.

Noong Marso 19, kinasuhan ng mga pederal na taga-usig ng U.S. ang tatlong indibidwal na may kaugnayan sa Super Micro dahil sa ilegal na paglilipat ng $2.5 bilyong halaga ng mga Nvidia AI server patungo sa Tsina, na lumalabag sa mga batas ng U.S. na nagbabawal sa pagluwas ng chip patungong Tsina nang walang lisensya.

Ginamit ng tatlo ang isang tagapamagitan na nakabase sa Timog-Silangang Asya upang itago ang katotohanang nakalaan para sa Tsina ang mga server, ayon sa indictment ng U.S. na binanggit ng CNN.

Nagbigay ang tatlo ng mga pekeng dokumento bilang bahagi ng panlilinlang habang inililipat ang mga server sa mga kahon na walang marka upang itago ang kargamento bago pa makarating sa mga customer sa Tsina, dagdag pa ng ulat.

Ayon sa mga taga-usig, muling ibinalot ng mga suspek ang mga server sa mga kahon na walang tatak bago ipadala sa mga kostumer sa Tsina.

Tinukoy ng mga awtoridad ang mga suspek na sina Wally Yih-Shyan Liaw, Steven Ruei-Tsang Chang, at Willy Ting-Wei Sun.

Nagpiyansa ng $5 milyon si Liaw, isa sa mga co-founder at dating board member ng Super Micro, para sa kanyang paglaya habang kasalukuyang nakikipag-usap sa mga taga-usig ang panlabas na kontratista na si Sun, na tinutukoy ng mga awtoridad bilang "fixer" sa ilegal na operasyon, para sa kanyang pansamantalang paglaya matapos ang pagdinig sa korte noong unang bahagi ng Abril.

Patuloy na pinaghahanap ng mga awtoridad si Chang, ang general manager ng Super Micro sa Taiwan branch.

Mga butas sa batas

Tinawag na "isang kabalintunaan" ni Chung ng DPP ang paghahangad ng mga taga-usig ng U.S. ng 20 taong pagkakabilanggo para sa mga suspek, habang "falsification" lamang ang maaaring isampang kaso sa Taiwan. Madalas na nauuwi lamang sa multa ang hatol sa mga ganitong uri ng kaso.

Hinimok ni Chung ang pamahalaan ng Taiwan para sa "agarang pagpapatupad ng ganap na pagbabawal sa pagluwas ng mga chip sa Tsina."

​"Kung pananatilihin ng Taiwan, bilang silicon shield ng pandaigdigang [alyansa] sa semiconductor, ang mas maluwag na sistema ng regulasyon [ng mga kontrol sa pag-export ng chip] para sa mga bansang kaaway kaysa sa ating katapat na Estados Unidos… hindi lamang natin pinahihina ang ating sariling pambansang seguridad, kundi sinasayang din natin ang tiwala ng internasyonal na komunidad sa Taiwan," pahayag ni Chung sa Facebook noong Hunyo 17.

Hindi itinuturing ng Taiwan na krimen ang hindi awtorisadong pagluwas ng mga AI chip patungong Tsina, bagama’t isinasama ng kanilang mga awtoridad ang mga kumpanyang Tsino, kabilang ang Huawei and Semiconductor Manufacturing International Corp. (SMIC) sa isang export blacklist.

Dahil dito, noong dakpin ng mga awtoridad sa Taiwan ang tatlong suspek na Taiwanese noong huling bahagi ng Mayo dahil sa di-umano'y pagpuslit ng mga AI server ng Super Micro na naglalaman ng mga makabagong chip ng Nvidia na posibleng patungo sa Tsina, isa lamang ang naging opsyon ng mga taga-usig sa isla: isang kaso ng pamemeke.

Isinasaalang-alang ng Taiwan ang pagpapatupad ng mga restriksyon sa pagbebenta ng mga AI chip sa "lahat ng kostumer sa Tsina" at ang pagtakda sa pagpuslit ng mga AI chip bilang isang krimen, ayon sa ulat ng Bloomberg noong Hunyo 9, na kumuha ng impormasyon mula sa mga taong pamilyar sa usapin.

Binanggit ng ulat na kinumpirma ng Ministry of Economic Affairs ang layunin nitong paigtingin ang pangangasiwa sa mga "strategic high-tech goods" para sa mas mahusay na pagkakahanay sa mga pandaigdigang kontrol sa pag-export habang pinangangalagaan ang pambansang seguridad ng Taiwan.

Mga alalahanin sa pambansang seguridad

Ang iminumungkahing kontrol ng Taiwan, kung ipapatupad, ay maghuhudyat ng determinasyon nito na makipagsabayan sa mga restriksyon sa chip ng Washington at tugunan ang mga butas na nabunyag sa kaso ng Super Micro, ayon kay Lin Tsungnan, isang propesor ng electrical engineering sa National Taiwan University sa Taipei, .

Ang mas mahigpit na kontrol ay maglilimita sa kakayahan ng Beijing na makakuha ng mga makabagong processor na maaaring gamitin sa mga aplikasyong militar, dagdag niya.

"Ang pagbabawal sa pagluwas ng mga AI chip sa Tsina ay isang tamang hakbang [para sa Taiwan]; kung hindi, magsisilbi itong pagbibigay [sa Tsina ng bentaheng militar sa pamamagitan ng] pagbebenta ng mga makabagong [AI-powered] na armas sa ating kalaban, bagay na unti-unting magpapahina sa ating sariling pambansang seguridad," sinabi ni Lin sa Focus.

Ang pagpapaunlad ng isla sa mga drone o iba pang unmanned technology na gagamitin sa anumang digmaan sa hinaharap sa Taiwan Strait ay mangangailangan ng pagpapanatili ng Taiwan ng kalamangan sa paggamit ng next-generation AI technology, aniya.