Ayon kay Cheng Chung-lan | 2025-09-18

May mga ulat na lumalabas sa Japan tungkol sa malawakang pagbili ng lupa na pinondohan ng mga Chinese investor, na labis na ikinababahala ng publiko.

Mula sa isang resort para sa mga turista sa Hokkaido hanggang sa isang isla sa Seto Inland Sea, pinalalala ng mga pagbiling ito ang hinala na ang mga proyektong tila pang-komersyal lamang ay maaaring magbanta sa mga estratehikong lugar at mahahalagang yaman, na nagiging bagong panganib sa pambansang seguridad.

Ang bayan ng Kutchan sa Hokkaido ay nasa paanan ng Mount Yotei mga dalawang oras sa timog-kanluran ng Sapporo.

Ang mga planong real estate ng mga Chinese sa Kutchan ay umani ng kontrobersya. Noong Hulyo, iniulat ng lingguhang magasin na Shukan Bunshun na isang consortium ng mga kumpanyang Chinese ang bumili ng humigit-kumulang 60 ektarya ng lupa sa Kutchan upang bumuo ng “China Village.” Ilegal na ginapas ng mga developer ang 3.9 ektarya ng kagubatan, na ikinagulat ng lokal na komunidad.

Matapos makumpirma ang mga paglabag sa proyekto, iniutos ng pamahalaan ng Hokkaido ang pagpapatigil ng konstruksyon noong unang bahagi ng Hunyo.

Isang dating empleyado ng kumpanya ng konstruksyon ang nagsabi sa isang istasyon ng TV na kabilang sa mga manggagawa ang "grupo ng mga Chinese na naninirahan sa Japan" pati na rin ang mga trabahador na dinala mula sa China para sa konstruksyon ng panlabas na pader.

Ang mga manggagawa ay nagpapalit-palit kada dalawang linggo, na may 60 hanggang 70 manggagawa sa lugar sa anumang oras, at ang mga materyales sa konstruksyon ay ipinadala mula China sa pamamagitan ng mga container, ayon sa dating empleyado, .

Ayon sa imbestigasyon ng Shukan Bunshun, nagsimula ang trabaho sa proyektong tinatawag ding “Kutchan Town New Life Project” noong 2019. Nakatakdang matapos ito pagsapit ng 2035. Kasama sa mga plano ang pagtatayo ng hotel, mga condominium, supermarket, at mga pampublikong espasyo.

“Ang proyektong ito ay nakatuon sa mga Chinese [mamimili]. Nagsimula na silang magpatakbo ng mga patalastas sa mga Chinese website para i-promote ang bentahan ng mga bahay bakasyunan,” ayon sa isang hindi pinangalanang opisyal.

Bahagi ng 60 ektaryang lupa ay muling naibenta sa iba pang investor at kumpanyang Chinese, kinumpirma ng isa pang opisyal.

Ilang tagamasid ang naghihinalang pinaplano ng mga kumpanyang Chinese na ilagay sa bote ang lokal na sariwang tubig para i-export sa China. Ang pag-export ng tubig ay maaaring magdulot ng panganib sa lokal na imprastruktura at seguridad.

Maaaring lumabag ang proyektong ito sa pitong batas, kabilang ang mga may kinalaman sa pagtotroso, mga building code, urban planning, landscaping, polusyon sa lupa, at pangangalaga sa tubig, iniulat ng Shukan Bunshun.

Ang mga lokal na magsasaka ay nagpahayag ng pangamba.

“Parang magiging lugar ito para sa mayayamang Chinese,” sinabi ng isang magsasaka sa Shukan Bunshun noong Hulyo. “Higit pa rito, isinagawa ang konstruksyon nang walang pahintulot at punô ng mga paglabag … at ang pinakanakakatakot sa lahat ay posibleng magdulot ito ng pagbaha.”

Estratehikong himpilan sa ilalim ng pamumuhunang Chinese

Ang kahalintulad na kaso ay lumitaw sa Isla ng Kasasa sa Seto Inland Sea. Minsang inilarawan ng mga residente bilang isang tahimik na pahingahan, ngayon ay nakararanas ito ng sunod-sunod na pagbili ng lupa ng mga Chinese investor. “Pinapatag na ng mga developer ang mga bundok upang gawing lote ng pabahay,” ayon sa isang residente sa Sankei Shimbun.

Ayon sa pamahalaang Prepektura ng Yamaguchi, ang isla ay matatagpuan mga 2 kilometro mula sa Komatsu Port sa Isla ng Suo-Oshima at sumasaklaw sa humigit-kumulang 940,000 sq. meters.

Mayroon lamang limang kabahayan sa isla na may pitong residente, at tatlo lamang sa kanila ang naninirahan doon nang full-time. Umaasa ang transportasyon sa isang ferry na bumibiyahe mula Komatsu ng tatlo hanggang apat na beses kada araw.

Sa mga dating liblib na lugar, nagsimula nang lumitaw ang mabibigat na makinarya at tila mga linya ng kuryente. Sa mga kamakailang larawang kuha mula sa himpapawid, makikitang pinutol na ang mga kagubatan, na tila paghahanda para sa malawakang pag-unlad.

Ilan sa mga may-ari ng lupa ay may nakarehistrong address sa Shanghai, ayon sa mga rekord ng ari-arian,.

Iniulat ng mga ahente ng real estate ang pagdami ng mga katanungan, kabilang ang mga malalaking alok mula sa mga mamamayang Chinese na naninirahan sa Tokyo at Saitama. Ang isang grupo ng turista mula Dalian, China ay bumisita pa sa isla.

“Walang direktang pinsala ang nangyari sa amin, pero … kung ang lupang ito ay tuluyang mapupunta sa mga Chinese, kami na mga Japanese ang magiging minorya rito,” ayon sa isang residente.

Ang Chinese social media ay naglalaman ng mga mapangutyang komento gaya ng, “Ang mura naman. Paano ko ito mabibili?” May isang user pa na nanghimok sa isang potensyal na mamimili na “itanim ang bandila ng China kapag nabili mo na ito.”

Malapit sa ruta ng mga eroplanong militar ng US

Ang pagbili ng mga Chinese sa ganitong sensitibong ari-arian ay nagdulot ng pagkabahala sa mga komentaristang Japanese. Malapit ang Kasasa sa ruta ng mga eroplano ng base militar ng US sa Iwakuni. Isang maliit na bangka lamang ang kailangan upang marating ang base ng Hukbong-Dagat ng Japan sa Kure.

Ang mga batas ng China ay nagbibigay kapangyarihan sa Beijing na kumpiskahin ang mga ari-arian ng mga Chinese sa ibang bansa at obligahin ang mga mamamayan nito na makipagtulungan sa gawaing intelihensiya .

Ang Kasasa ay maaaring maging isang Chinese "drone base ," sinabi ni Iwakuni City Councilman Takashi Ishimoto.

“Kung magpatuloy ang mga Chinese sa pagbili ng mga isla sa Seto Inland Sea, maituturing na itong isang de facto na pananakop ng China,” aniya, batay sa ulat ng CNA news site ng Taiwan.

Ang kasalukuyang batas ng Japan, na nag-aatas lamang ng pag-uulat ng pagbili ng lupa ng mga dayuhan matapos itong maisagawa, ay hindi sapat, ayon kay Kiyoto Adachi, propesor ng batas at ekonomiya sa Hokusei Gakuen University sa Sapporo, sa panayam ng Sankei Shimbun noong Setyembre.

“Ang pagpapatupad ng isang sistema para sa mas masusing pagsusuri ay makatuwiran,” aniya, na binanggit ang kahalintulad na proseso ng Australia sa pagsusuri ng mga pagbili.

Iminungkahi niya ang pagpapatupad ng mga lokal na hakbang tulad ng mga ordinansa para sa tanawin o espesyal na buwis sa mga villa.