Ayon kay Jia Feimao | 2025-10-16

Ang Taiwan-Asia Exchange Foundation (TAEF) ay naglabas kamakailan ng ulat sa polisiya na pinamagatang "Pagtataguyod ng Estratehiya ng Taiwan sa Indo-Pacific," na sa unang pagkakataon ay iminungkahi ang pagbuo ng isang "security resilience chain." Dapat paigtingin ng Taiwan ang kooperasyong pangseguridad at ugnayang militar sa mga kaalyadong may kaparehong pananaw upang mapangalagaan nito ang depensa at katatagan ng rehiyon, ayon sa pag-aaral.

Noong Oktubre 8, ang TAEF, sa tulong ng Foreign Ministry, ay nagdaos ng Indo-Pacific defense summit at pormal na inilabas ang pang-estratehiyang ulat.

Mga konkretong hakbang ng Taiwan napakahalaga

Ang tumataas na impluwensyang awtoritaryan ay lumikha ng kawalang-katiyakan sa heopolitika, at matagal nang pinabayaan ng Taiwan ang seguridad sa pambansang estratehiya nito, ayon kay TAEF CEO Yang Hao.

Dapat magsagawa ng konkretong hakbang ang Taiwan upang palakasin ang kooperasyon sa pagitan ng mga bansa at pagsasanib ng depensa sa rehiyon kasama ang mga demokrasya na may kaparehong paninindigan, aniya.

Iginigiit ng Beijing na bahagi ng China ang Taiwan at kinokondena ang anumang bansa na nakikipagtulungan sa militar sa Taiwan dahil sa diumano’y pakikialam sa mga panloob na usapin ng China.

Habang pinalalakas ng mga awtoritaryong bansa gaya ng China at Russia ang kanilang pagtutulungan , ang balanse ng puwersang militar sa rehiyong Indo-Pacific ay nabulabog, ayon kay Lin Fei-fan, deputy secretary-general ng National Security Council (NSC), sa ginanap na pagpupulong.

Ang mga demokrasya ay nabigo sa pag-uugnay ng estratehiya

Ang mga demokratikong kaalyado ay kulang pa rin sa epektibong koordinasyon at interoperability, aniya.

Hinimok niya ang mga bansa sa Indo-Pacific na magsagawa ng konkretong hakbang upang tugunan ang hindi pagkakapantay-pantay sa militar at maglatag ng pundasyon para sa mas higit na kooperasyon.

Ang mga aktibidad ng China sa karagatan ay matagal nang lumampas sa larangang militar, ngayon ay pinagsasama na rin ang mga maritime militia, puwersa ng coast guard, at pagpapaunlad ng pangisdaan , kaya’t lumilikha ito ng panibagong uri ng banta, ayon kay Katsuya Yamamoto, direktor ng Strategy and Deterrence Program ng Sasakawa Peace Foundation sa Tokyo.

Hinimok niya ang Japan at Taiwan na palakasin ang palitan ng impormasyon at mga usapin sa patakaran upang maitatag ang matibay na pundasyon para sa kooperasyong panseguridad.

"Kailangan nating itatag ang ugnayan, militar sa militar," diin ni Yamamoto. Malapit ang ugnayang pangkultura at pang-ekonomiya ng Taiwan at Japan, ngunit walang direktang komunikasyong pangmilitar, ayon sa kanya..

Ang buong estratehikong first island chain , kabilang ang South Korea at Pilipinas, ay kailangang magtatag ng ugnayang militar-sa-militar, at hindi dapat mapag-iwanan ang Taiwan, aniya.

Ang patakarang ito, aniya, ang pinakadiwa ng “katatagan.”

Palitang opisyal-sa-opisyal

Pinapatakbo ng Sasakawa Peace Foundation ang Japan-China Friendship Fund, na nag-oorganisa ng regular na pagpapalitan sa pagitan ng mga opisyal militar ng Japan at China upang mapalalim ang pag-unawa at maiwasan ang hindi pagkakaunawaan o mga hidwaan, sinabi ni Yamamoto.

Napalawak na ng Japan ang mga katulad na programa sa South Korea, Indonesia, at iba pang bansa sa rehiyon. Iminungkahi ni Yamamoto na magtatag din ang Japan at Taiwan ng kaparehong palitan ng programa.

Sa isang Oktubre 9 na artikulong opinyon sa Foreign Affairs, nanawagan si Lin mula sa NSC sa mga demokratikong bansa na palakasin ang pakikipagtulungan sa seguridad kasama ang Taiwan. Binigyang-diin niya ang pangangailangan para sa magkasanib na kakayahan sa operasyon sa iba't ibang larangan.

Noong 2025, lalong pinalakas ng Taiwan at Estados Unidos ang ugnayang pangdepensa nila "sa pamamagitan ng pagbili ng kagamitang militar at paghahatid ng mga armas, na lalong nagpapabilis sa kahandaan ng Taiwan," aniya.

Itong hakbang ay dapat gumising sa ibang mga demokrasya, aniya.

Kung babagsak ang Taiwan, guguho ang panrehiyong pananggalang at bibilis ang awtoritaryong paglawak, aniya. Hinimok niya ang mga demokrasya na kumilos na ngayon upang palakasin ang kolektibong ugnayang pangseguridad at isulong ang interoperability.