Ayon kay Chen Wei-chen | 2025-12-11

Pagbukas ng mga ilaw sa Shanghai Oriental Sports Center noong Nobyembre 29, tumayo mag-isa sa entablado ang Japanese pop star na si Ayumi Hamasaki, na tumatanghal sa harap ng mahigit 14,000 bakanteng upuan.

Nang gabing iyon, biglang kinansela ng mga awtoridad sa Tsina ang konsiyerto, “force majeure” (hindi inaasahang pangyayari) umano ang dahilan.

Kahit nagsimula nang baklasin ng mga crew ang entablado, tinapos pa rin ni Hamasaki ang buong set at nag-bow kasama ang kanyang staff sa harap ng mga hanay ng bakanteng upuan matapos ang pagtatanghal. Sa ibaba ng mga ilaw, nagliparan ang mga confetti.

Sa isang post sa Facebook, sinabi ni Hamasaki na kahit “14,000 bakanteng upuan” ang hinarap niya, naramdaman pa rin niya ang “matinding pagmamahal” mula sa kanyang mga tagahanga.

“Dapat nagsisilbing tulay ang entertainment para pag-ugnayin ang mga tao,” aniya.

Naganap ang “no-audience concert” sa gitna ng nagpapatuloy na tensyon ng Tsina at Japan tungkol sa Taiwan, at ito ang pinakabagong palatandaan na umaabot na sa larangan ng kultura ang pagganti ng Tsina sa Japan.

Noong unang bahagi ng Nobyembre, sinabi ni Japanese Prime Minister Sanae Takaichi sa parlamento na “kung magkaroon ng gulo sa Taiwan, maaaring malagay sa panganib ang kaligtasan at katatagan ng Japan bilang isang bansa.”

Ang pahayag na ito ay nagdulot ng galit sa Beijing. Pagkatapos ng ilang hakbang sa diplomasya, sinimulan ng Tsina ang pagkansela o pagbabawal sa mga konsiyerto ng mga Japanese artist.

Pag-awit sa mga bakanteng upuan

Agad na naging viral ang mga litrato ng "konsiyertong walang taganuod."

Sinabi ng The Paper, isang media outlet na konektado sa gobyerno ng Tsina, na pekeng konsiyerto ito, at sinabi na ang mga litrato ay lihim na kuha lamang noong rehearsal.

Habang umiigting ang alitan, kinumpirma online ni Mika Takahashi, beautician ni Hamasaki, na totoong naganap ang konsiyerto nang walang taganuod.

Ang Japanese singer na si Maki Otsuki, na kilala sa theme song ng matagal nang anime na “One Piece,” ay naharap din sa parehong sitwasyon isang araw bago ang insidenteng iyon.

Ilang sandali matapos magsimula ang kanyang pagtatanghal sa Bandai Namco Festival sa Shanghai noong Nobyembre 28, biglang pinatay ng mga tauhan ang ilaw, projection, at musika. Dalawang staff na nakaitim ang pumanhik sa entablado, kinuha ang kanyang mikropono, at inialis siya habang nagulat ang mga tagahanga.

Inanunsyo ng organizer na kinansela ang pagtatanghal sa parehong dahilan, at tinapos na ang lahat ng nakatakdang programa para sa araw na iyon.

Agad na naging viral sa buong mundo ang mga video ng pangyayari.

"Ito na yata ang pinakawalang-galang na paraan ng mga Chinese censor para kanselahin ang isang palabas,” ayon sa isang user sa X.

Ayon sa isang Taiwanese user, ipinakikita ng hakbang na ito na “ang mga nasa kapangyarihan... ay hindi pinapayagan ang kalayaan kahit ng isang kanta lang.”

Mula noon, naging paboritong dahilan ng mga awtoridad sa Tsina ang “force majeure” para ipagbawal ang mga Japanese cultural event. Mula huling bahagi ng Nobyembre hanggang unang bahagi ng Disyembre, mahigit 20 na kaganapang may kinalaman sa Japan ang kinansela nang halos walang abiso.

Nang maghanda ang 80-anyos na jazz musician na si Yoshio Suzuki na tumanghal sa Beijing, sinabi ng mga pulis na nakasibilyan sa venue na ipinagbabawal ang anumang event na may Japanese na kalahok.

Sama-samang sumuporta ang mga Japanese sa kanilang mga artist

Sinikap ni Takaichi na tipunin ang mga tagasuporta ng kanyang bansa at labanan ang pagtutol ng Tsina, at nangakong “lilikha ng kinabukasan kung saan ang Japanese music ay maririnig sa iba't ibang dako gaya ng Asia, Europe, at North America,” ayon sa isang kamakailang post sa X.

Itinuturing ng maraming media sa Japan ang pagkansela bilang sadyang paraan ng panggigipit.

Sinabi ni Shinichiro Azumi, anchor ng TBS Television, na layunin ng Tsina na pilitin ang administrasyon ni Takaichi na sumang-ayon sa kanilang hinihingi.

Sinabi ng journalist na si Akio Yaita sa Facebook na “ang paraan ng pamimilit ng Tsina ay nagpapakita ng kawalang-galang ng gobyerno ng Tsina sa sining at karapatang pantao.”

Idinagdag niya na maraming gumagamit ng social media sa Japan ang “matinding kumondena sa mga aksyon ng pamahalaan ng Tsina” at naniniwala na “hindi dapat pumayag ang Japan sa ganitong pambu-bully.”

Sa pagtatangkang ipagbawal ang J-pop at anime at atakihin ang malawak na entertainment, “naging panalo ito para kay Prime Minister Sanae Takaichi at ipinakita sa mundo kung sino ang tunay na nagbibigay-halaga sa kalayaan sa pagpapahayag,” habang nanganganib ang Beijing sa reputasyon nito sa buong mundo, tweet ni Bloomberg columnist Gearoid Reidy.