Ayon kay Ha Er-rui | 2026-03-20

Naging kauna-unahang bansa ang Australia na gumawa ng mga Guided Multiple Launch Rocket System (GMLRS) na rocket sa labas ng Estados Unidos, isang hakbang na sinabi ng pamahalaan na "nagpapalakas ng katatagan at nagbabawas ng pagdepende sa mga pandaigdigang supply chain."

Noong unang bahagi ng Marso, inihayag ng Department of Defense ng Australia ang pagbubukas ng kanilang unang pasilidad sa loob ng bansa sa Port Wakefield, South Australia. Ang pasilidad ay nakatuon sa paggawa ng mga sandatang GMLRS para sa High Mobility Artillery Rocket System (HIMARS), kung saan nakatakdang lumabas ang unang batch sa kalagitnaan ng Marso.

Pundasyon ng lokal na industriya ng depensa

Ang proyektong ito ay pundasyon ng isa sa limang pangunahing programa sa paggawa ng mga gamit na pangdepensa ng Australia. Bumubuo ito ng mahalagang bahagi ng 21 bilyong AUD ($14.8 bilyon) Guided Weapons and Explosive Ordnance (GWEO) Plan ng bansa na nakatakdang ipatupad sa susunod na dekada.

"Muling pinagtitibay ng pagsisikap na ito ang aming pakikipagtulungang pangdepensa sa Estados Unidos, kasama na ang lumalawak naming kolaborasyon sa guided weapons at explosive ordinance, at bibigyan nito ang aming ADF [Australian Defense Force] ng kakayahang makapagsagawa ng long-range strike na makakatulong sa kaligtasan ng mga Australyano," ani Pat Conroy, Minister for Defense Industry, noong Disyembre.

Upang palawakin ang kakayahan ng Australia sa long-range strike at isulong ang layunin ng pamahalaan ni Anthony Albanese na bumuo ng sariling industriya ng mga guided weapon, nakipagtulungan ang Department of Defense ng Australia sa Lockheed Martin para simulan ang lokal na produksyon ng GMLRS.

Natapos ng mga construction crew ang pasilidad sa Port Wakefield nang wala pang pitong buwan, matapos sanayin ang unang grupo ng mga Australyanong manggagawa sa planta ng Lockheed Martin sa Camden, Arkansas.

"Isang mahalagang hakbang para sa GWEO Enterprise ng pamahalaan ng Australia ang pagtatapos ng pagtatayo ng makabagong pasilidad na ito," ayon kay Paula Hartley, vice president ng Tactical Missiles sa Lockheed Martin.

"Sa pamamagitan ng pagtatatag ng lokal na produksyon ng GMLRS, pinalalakas namin ang sariling kakayahan ng bansa at tinitiyak na tugma ito sa mga imbentaryo ng Estados Unidos," dagdag pa niya.

Layuning 4,000 missile bawat taon

Inaasahan ng pamahalaan ng Australia na matutupad ng hiwalay na pasilidad na ito ang kanilang pangmatagalang layunin na makagawa ng 4,000 missile kada taon pagsapit ng 2029. Ang pangunahing layunin ay magkaroon ng buong kakayahan sa paggawa ng missile upang mapunan muli ng Australia ang sariling stockpile ng armas sakaling magkaroon ng digmaan sa hinaharap.

"Sa pagkakaroon ng kakayahang gumawa ng mga sandatang ito sa loob ng bansa, pinalalakas ng Australia ang tibay nito sa krisis at kakayahang ilagay sa panganib ang mga kalaban, kaya mapipigilan nito ang mga kalaban at makatutulong na maisakatuparan ang pangunahing layunin ng National Defense Strategy," pahayag ni Australian Brig. Jim Hunter, namamahala sa produksyon ng guided weapons, noong unang bahagi ng Marso.

Ang layunin ng Australia ay tumugma sa kalidad ng mga sandatang ginagawa sa Estados Unido, aniya.

Nais ng Canberra na bawasan ang matagal nang pagdepende sa mga supply chain ng ibang bansa, upang hindi na mapilitang maghintay nang matagal bago mapalitan ang mga armas sa panahon ng krisis. Ang GMLRS, isang highly mobile rocket system na pangunahing ginagamit sa HIMARS, ay may saklaw na 70 km at may precision guidance at control systems para maitama ang direksyon habang lumilipad.

Ang makabuo ng mas makabagong Precision Strike Missile (PrSM), na kayang tumama ng mga target na 1,000 km ang layo ang pangmatagalang layunin ng Australia para sa assembly facility. Kasunod ng pinagsamang mga air strike ng US at Israel sa Iran noong huling bahagi ng Pebrero, ipinakita ng footage mula sa US Central Command ang isang missile na inilunsad ng M142 HIMARS na may katangiang tugma sa PrSM. Ipinapahiwatig ng footage na maaaring nagamit na ang PrSM sa labanan.

Posibleng pakikipagtulungan sa Taiwan

Bilang pagsusuri sa mga kaganapang ito sa rehiyon, isinulat ni Kao Chih-jung, isang assistant research fellow sa Institute for National Defense and Security Research ng Taiwan, sa website ng institusyon na bagaman ang Taiwan at Australia ay walang pormal na alyansa, ang 2026 na kalagayan ng seguridad sa Indo-Pacificay nagbibigay ng malaking posibilidad para sa kanilang pakikipagtulungan.

Nag-aalok ng mga natatanging oportunidad ang mga larangan tulad ng artificial intelligence, hypersonic weapon, at electronic warfare. Maaaring gamitin ng Taiwan ang husay nito sa mga semiconductor upang maging tagasuplay ng mahahalagang piyesa para sa pagpapaunlad ng Australia ng mga drone swarm at precision missile, ayon kay Kao.

Bilang karagdagan, dahil parehong gumagamit ang Taiwan at Australia ng mga kagamitang gawa sa US, kabilang ang F-16V, HIMARS, at mga M1A2 tank, may malakas silang potensyal na magtulungan sa logistical maintenance at suplay ng mga piyesa.

Maaaring gamitin ng Taiwan ang husay nito sa high-tech na industriya para isulong ang "pakikipagtulungan sa paggawa ng mga murang strike system na kailangan para sa 'asymmetric warfare capabilities,' o kahit ipagawa sa mga kumpanyang Australyano ang mga missile sa ilalim ng kontrata o lisensiya na tutugon sa parehong pangangailangan ng Taiwan at Australia," ayon kay Kao.