Ayon kay Ha Er-rui | 2026-05-12

Inilahad ni U.S. Secretary of War Pete Hegseth sa pagdinig sa dalawang kapulungan ng Kongreso noong huling bahagi ng Abril ang estratehiya ng Washington sa Indo-Pacific at tugon nito sa bantang militar ng Tsina.

Ayon kay Pete Hegseth, pipigilan ng Estados Unidos ang Tsina "sa pamamagitan ng lakas at hindi komprontasyon," na may pangunahing layunin na mapanatili ang kapayapaan at katatagan sa rehiyon.

"Tungkulin namin na tiyaking nakikita ng Beijing ang hindi matatawarang lakas-militar ng U.S.," sinabi ni Pete Hegseth sa mga mambabatas.

Balanse ng kapangyarihan

"Hindi layunin ng U.S. na mangibabaw sa Tsina, ni gipitin o hamakin ito," sabi ni Pete Hegseth. "Sa halip, simple lang ang aming hangarin: Pigilan ang sinuman, kabilang ang Tsina, na mangibabaw sa amin o sa aming mga kaalyado."

Ayon sa kanya, layunin ng estratehiya ang "isang balanseng ugnayan, isang balanse ng kapangyarihan na magbibigay-daan sa lahat -- sa lahat ng bansa -- na magtamasa ng disenteng kapayapaan sa Indo-Pacific, kung saan malaya at patas ang daloy ng kalakalan, kung saan lahat ay maaaring umunlad at iginagalang ang interes ng bawat isa."

Ang naturang pahayag ay inilabas bago ang nakatakdang pagbisita ni Pangulong Donald Trump sa Tsina ngayong kalagitnaan ng Mayo para sa ikalawang pakikipagpulong kay Pangulong Xi Jinping, kasunod ng summit noong nakaraang Nobyembre.

"Mas mabuti at mas matatag ngayon ang relasyon ng Estados Unidos at Tsina kaysa mga nagdaang taon," sabi ni Hegseth. "Ang palitan ng state visit sa 2026 ay magbibigay ng pagkakataon para sa higit pang pag-unlad ng ugnayan ng dalawang bansa."

Ayon sa kanya, nanatiling aktibo ang komunikasyon sa pagitan ng militar ng Amerika at ng Tsina matapos ang kanyang pakikipagpulong noong Oktubre kasama si Defense Minister Dong Jun. Ang mga palitang ito ay sumasalamin sa mas malawak na pagsisikap ng Pentagon na pamahalaan ang alitan at pababain ang tensyon sa People's Liberation Army ng Tsina.

Muling iginiit ni Pete Hegseth na hindi layunin ng Washington na "gipitin" ang paglago ng Tsina o baguhin ang status quo sa Taiwan, at binigyang-diin ang pagiging bukas.

"Tungkulin namin na tiyaking nakikita ng Beijing ang hindi matatawarang lakas-militar ng U.S.," pahayag ni Pete Hegseth, kasabay ng panawagan sa Tsina na "igalang ang matagal nang interes ng Amerika sa Indo-Pacific."

Ayon kay Hegseth, hindi layunin ng Washington na mangibabaw sa Beijing. Sa halip, nais nitong tiyakin na "walang kaalyado ang magiging biktima ng tuloy-tuloy at matagumpay na agresyong militar. Ito ang ibig sabihin ng deterrence sa Indo-Pacific."

"Titiyakin naming kaya ng aming militar, kung kinakailangan, na magpakita ng tuloy-tuloy na kakayahan sa First Island Chain at sa buong Indo-Pacific. Ibig sabihin nito ay dapat maging sapat ang lakas upang hindi na maisip pa ang anumang agresyon, at mapanatili ang kapayapaan. Ito ang tinatawag na deterrence by denial."

Kasama sa estratehikong "first island chain" ang Japan, Taiwan, at Pilipinas.

Saklaw ng Tsina

Lumalawak na ang presensyang militar ng Tsina mula sa mga karagatan ng Northeast Asia hanggang sa South Pacific at patungo sa Indian Ocean. Ang lalong nagiging regular na mga operasyon nito ay nagdudulot ng matinding pressure sa mga bansang nasa First Island Chain at mga karatig-bansa nito sa Indo-Pacific.

Sa isang estratehikong pagsusuri ng Australian Strategic Policy Institute, sinuri ang mga posibleng senaryo ng pagpapalawak ng militar ng Tsina hanggang 2031 at 2036. Ayon dito, maaaring magbago ang Beijing mula sa paminsan-minsang presensya sa dagat tungo sa tuloy-tuloy na impluwensiya sa parehong rehiyon ng karagatan. Sinabi ng think tank na ang bumibilis na ambisyon ng Tsina ay maaaring sumubok sa "pagkakaisa ng rehiyon at katatagan ng alyansa."

Ugnayang alyansa

Dahil sa lumalawak na impluwensiya ng Tsina at banta mula sa North Korea at Russia, iminungkahi ni U.S. Army Gen. Xavier T. Brunson, commander ng United Nations Command at U.S. Army Forces Korea, ang pag-uugnay ng kakayahang militar ng South Korea, Japan at Pilipinas sa tinatawag na "kill web." Ang mabilis na sistemang ito ng pagtukoy ng target ay gumagamit ng network ng mga satellite, drone at ground sensor upang magpadala ng datos at umatake sa mga target sa real time.

"Kailangan nating pag-ugnayin ang mga magkakatugmang kakayahang ito sa isang kill web na magdudulot ng pinagsama-samang epekto sa lahat ng larangan," sinabi niya sa Japan Times nitong Abril.

Ipinapakita ng panukalang ito ang mas malawak na pagbabago sa pag-iisip ng Pentagon -- mula sa pagturing sa mga banta bilang hiwa-hiwalay na insidente tungo sa pinagsama-sama at nakabatay sa alyansang depensa.

Sinabi ni Brunson na ang tanong ay kung handa na bang magtulungan ang mga puwersa ng alyansa sa pagtugon, "o nagmamadali pang magkoordina matapos ang pangyayari."

"Wala sa mga alyansang ito ang maaaring manatiling hiwa-hiwalay," pahayag ni Xavier T. Brunson. "Kapag pinag-ugnay ang mga ito, lumilikha ito ng magkakapatong na lakas na walang iisang direksiyong mapagpaplanuhan ng kalaban."

Ipinapahiwatig ng mga pahayag nina Hegseth at Brunson ang pagsisikap ng Washington na higit pang isulong ang integrasyon ng militar sa mga kaalyado sa Indo-Pacific habang pinananatiling bukas ang komunikasyon sa Beijing.

"Hangad namin ang kapayapaan, ngunit kailangan naming maghanda para sa digmaan," pahayag ni Hegseth sa Kongreso.