Ayon kay Jia Feimao | 2025-09-12

Lumalakas ang kapangyarihang pandagat ng China, at may mga implikasyon ito para sa Taiwan at iba pang mga bansa sa South China Sea.

Ang pinakabagong aircraft carrier ng China, ang Fujian, ay naglayag saTaiwan Strait noong Setyembre 11, patungo sa South China Sea bilang bahagi ng mga pagsasanay nito sa dagat. Nagdulot ito ng mga haka-haka na maaaring hindi na magtatagal bago ito maging opisyal na bahagi ng serbisyo.

Ang China ay may dalawang mas lumang carrier, ang Liaoning at ang Shandong.

Makikita sa mga imaheng inilabas ng Japanese Defense Ministry Joint Staff Office ang walang lamang kubyerta ng Fujian habang lumilipad, isang indikasyon na ang paglalakbay nito ay nakatuon sa mga pagsasanay.

Sa isang ulat ng Reuters, ipinahayag diumano ng hukbong pandagat ng China na ang paglalakbay na ito ay nakatuon sa “siyentipikong pananaliksik at mga misyon ng pagsasanay.”

"Ang mga pagsasanay at ehersisyong militar sa iba't ibang rehiyon ... ay walang partikular na target," dagdag pa ng hukbong pandagat.

Kinumpirma ng Maritime Self-Defense Force ng Japan na noong nakaraang araw ay namataan ang carrier sa East China Sea. Nakita ang Fujian sa layong 200 kilometro hilagang kanluran ng Senkaku Islands, kasama ang dalawang missile destroyer.

Ayon sa Ministry of Defense ng Taiwan, minamatyagan na nila ang mga sasakyang pandagat na ito at "gumawa na sila ng mga kinakailangang hakbang," ayon sa Reuters.

Sinabi ng isang nakatataas na opisyal ng seguridad ng Taiwan sa Reuters na malamang ay papunta ang carrier sa South China Sea bilang paghahanda para sa paglulunsad nito.

"Ang mga sasakyang pandagat ng China na naglalayag sa mga kaugnay na katubigan ay ganap na sumusunod sa pambansang batas ng China at sa pandaigdigang batas," ani Lin Jian, tagapagsalita ng Foreign Ministry ng China, sa isang press briefing noong Setyembre 12.

Mas mainam ang mga kondisyon sa South China Sea para sa mga sistematikong pagsasanay kumpara sa East China Sea, at ang pagdaan sa Taiwan Strait ang pinakapraktikal na ruta para dito, ayon kay naval analyst Li Jian sa isang post sa Weibo account ng China Central Television (CCTV), ang tagapagbalita ng pamahalaan ng China.

Ang kumbinasyon ng mga pagsasanay at ehersisyo ay nagpapabilis sa paghahanda ng carrier para sa posibleng pakikidigma, aniya.

Ang ikatlong carrier ng China

Ang Fujian, na unang ipinakita noong 2022, ay ang ikatlong aircraft carrier ng China at ang kauna-unahang ginamitan ng electromagnetic aircraft launch system (EMALS).

Sa isang dokumentaryong ipinalabas ng CCTV noong Agosto 3, ipinakita ang paggamit ng EMALS, kabilang ang paglulunsad ng isang J-15T fighter jet. Sinabi ni Tian Wei, isang crew member ng Fujian, sa programa: “Ang pinagbubuti namin ay hindi lamang ang catapult launch process ng Fujian, kundi pati na rin ang mga pamamaraan sa paglulunsad ng lahat ng carrier na may catapult system.”

Nagsimula na ang barko sa mga pagsasanay sa dagat noong nakaraang taon, ngunit hindi pa ito ginagamit sa aktwal na serbisyo. Habang ang mga naunang aircraft carrier na Liaoning at Shandong ay gumagamit ng ski-jump ramp, ang Fujian ay may tatlong catapult track at mga arresting gear, na nagpapahintulot dito na magsagawa ng sabayang paglulunsad ng mga sasakyang panghimpapawid.

Wala pang inilalabas na impormasyon ang China ukol sa petsa ng pagtatalaga ng carrier o kung saang pantalan ito itatalaga. Tinataya ng mga analyst na maaaring itakda ang pagtatalaga nito sa petsang makahulugan para sa China, tulad ng Setyembre 18 o Oktubre 1.

Ang posibleng daungan nito ay ang Yulin Naval Base sa isla ng Hainan, o di kaya’y sa lalawigan ng Fujian, na matatagpuan sa tapat mismo ng Taiwan.

Mas maraming sasakyang panghimpapawid, mas mabilis na paglulunsad

Sa dokumentaryo, ipinaliwanag ng Chinese military commentator na si Zhang Junshe ang mga kabilang sa "five-piece set" ng mga carrier-based aircraft: ang mga stealth fighter, multi-role catapult-launched fighter, fixed-wing early warning aircraft, fixed-wing electronic warfare aircraft at ang antisubmarine helicopter.

Ang mga ito, aniya, ay inaasahang itatalaga sa Fujian.

Magpabubuti ng kahusayan ang catapult system, ani Su Tzu-yun, ang director ng Division of Defense Strategy and Resources sa Institute for National Defense and Security Research ng Taiwan.

Ang mga fighter na dati'y kailangan ng 90 segundo upang mailunsad ay kaya nang mapalipad sa loob lamang ng isang minuto.

"Nabibigyang-daan nito ang Fujian na makapaglunsad ng mas maraming sasakyang panghimpapawid sa itinakdang oras, na nagreresulta sa mas makapal na aerial firepower network," sabi niya sa Focus.

May kapasidad ang Fujian na magdala ng humigit-kumulang 60 sasakyang panghimpapawid, kabilang na rito ang hanggang 40 J-15T. May kakayahan din itong maglunsad ng mga early warning plane at pahabain ang saklaw ng "defensive zone" ng higit sa 600km, ayon sa Taiwanese na mananaliksik na si Chieh Chung.

Kung ikukumpara ang mga carrier, kayang magdala ang Liaoning ng 24 na fighter, habang 36 naman ang kayang dalhin ng Shandong.

Mas maraming carrier, mas malawak na saklaw pandagat

Sa pagkakaroon ng tatlong carrier, magagawa ng Beijing na panatilihin ang isa sa pantalan, habang ang isa ay maaaring nakatalaga sa South China Sea, at ang ikatlo naman ay malapit sa estratehikong first island chain, ani Chieh.

Kabilang sa chain ang Japan, Pilipinas, at Taiwan.

Ang Fujian ay pinakaangkop na italaga sa silangan ng Taiwan, lampas pa sa island chain, sabi ni Chieh sa Voice of America noong nakaraang taon.

Mula roon, maaaring salakayin ng carrier ang mga air at naval base ng Taiwan sa silangang bahagi sa pamamagitan ng paglulunsad ng mga cruise missile, habang hinaharangan ang US at mga kaalyado nito na makialam sa Western Pacific.

Ayon sa mga manunuri ng rehiyon, ang paggamit ng bagong carrier ay makapagpapabago sa estratehikong pagkabalanse ng kasalukuyang sitwasyon.

"Kapag ang carrier ay naitalaga na bilang opisyal na bahagi ng lumalaking hukbong pandagat ng China, mararamdaman ang epekto nito sa buong rehiyon na may iba't ibang posibleng lugar ng hidwaan, kabilang na ang Taiwan," ayon sa ulat ng Kyodo News ng Japan.

Ibinasura ng pamahalaan ng Taiwan ang pag-aangkin ng Beijing sa isla.

Itinuturing ng China na bahagi ng kanilang teritoryong katubigan ang Taiwan Strait, samantalang para sa Taiwan, United States, at mga kaalyado nito, ito ay isang pandaigdigang daanang-dagat alinsunod sa United Nations Convention on the Law of the Sea.