Ayon sa Focus | 2026-01-30

Bumabaling ang Pilipinas saSouth Korea para sa iba't ibang kagamitang pandepensa habang isinusulong ng Maynila ang pagpapaunlad ng militar nito sa gitna ng tumitinding tensyon sa South China Sea.

Ayon sa ulat ng Korea JoongAng Daily noong Enero 15, nahihikayat ang Armed Forces of the Philippines (AFP) sa alok ng Seoul na mga de-kalidad na kagamitan, maigsing palugit ng pagpapadala, at katayuan nito bilang kaalyado ng US.

Nagaganap ang pagbabagong ito habang tumitindi ang tensyon sa karagatan. Ayon sa Asia Maritime Transparency Initiative, ang mga barko ng Pilipinas at Tsina ay nagkaroon ng karaniwang "12.1 araw ng interaksyon kada buwan" sa pagitan ng Agosto 2024 at Mayo 2025.

Itinuturing ng Tsina na teritoryo nito ang higit sa 80% ng South China Sea, bagaman sinalungat ng isang international court ang argumentong iyon noong 2016.

Dahil sa pagdami ng mga engkuwentro, pinabilis ng Maynila ang pagpapatupad ng Re-Horizon 3, ang huling yugto ng programa sa modernisasyon ng militar. Gamit ang $35 bilyong budget, nakatuon ang Re-Horizon 3 sa pagpapalakas ng depensang pandagat at panghimpapawid ng bansa habang pinagtutuunan naman ng AFP ang panlabas na depensa ng bansa sa halip na seguridad sa loob.

Pagtiyak sa seguridad ng 'first island chain'

Ang pagpapalakas na ito ay naaayon sa mas malawak na mga pagbabago sa rehiyon. Binibigyang-diin ng 2025 National Security Strategy ng pamahalaan ng US ang geopolitikal na kahalagahan ng "first island chain" bilang bahagi ng pagsisikap na labanan ang impluwensiya ng Tsina sa rehiyon.

Kabilang sa chain na iyon ang Japan, Taiwan at ang Pilipinas.

Hinihikayat ng estratehiya ng US ang mga kaalyado nito tulad ng Japan, South Korea, at Australia na dagdagan ang gastusing pandepensa at palakasin ang kani-kanilang kakayahang militar upang magtulungan sa pagbabahagi ng pasanin.

Mga opsyon sa pagtutulungang Plilipinas at S. Korea

Upang suportahan ang inisyatiba, pinahihintulutan ng 2026 General Appropriations Act na nilagdaan ni Pangulong Ferdinand Marcos Jr. ang mga “dayuhan at lokal na kasunduang pinansyal” upang makatulong sa pagpopondo sa pagkuha ng mga makabagong sistema.

“Dapat pag-aralan ng pamahalaan ng Korea ang iba’t ibang paraan upang makakuha ang mga umuusbong na bansa ng mga produktong pandepensa na gawa sa Korea nang hindi gaanong mabigat sa bulsa,” sinabi ni Jang Won-joon, isang defense analyst mula sa Jeonbuk National University sa Jeonju, South Korea, sa Korea JoongAng Daily.

Maaari pang pagaanin ng Seoul ang pasaning pinansyal ng Maynila sa pamamagitan ng pag-aalok ng isang "programang tulad ng subscription kung saan hinahati ang kabuuang halaga sa mga taunang bayad," aniya.

“Mula nang ilunsad ang tatlong-yugtong Horizon defense modernization initiative noong 2012, kumikilos ang Maynila sa loob ng balangkas na iyon upang palakasin ang kakayahang pandepensa nito, upang makasabay sa mga karatig-bansa at upang tumugon sa dumadalas na pagpasok ng Beijing sa loob ng Philippine EEZ [Exclusive Economic Zone],” ayon sa ulat ng International Crisis Group na inilathala noong nakaraang Agosto.

Matagal nang katuwang ng Philippine Navy ang shipbuilder na HD Hyundai Heavy Industries (HHI), na nakapaghatid na ng 10 sasakyang pandagat para sa fleet nito. Kamakailan, ipinadala ng HD HHI ang dalawang Miguel Malvar-class frigate -- ang BRP Miguel Malvar at BRP Diego Silang -- noong nakaraang Mayo at Disyembre.

Sa ilalim ng $578 milyong kontrata sa HHI na nilagdaan noong nakaraang Disyembre, nakatakdang tumanggap ang navy ng dalawa pang frigate pagsapit ng 2029. Ang naval support center ng HHI sa Subic Bay shipyard ay nagbibigay-daan sa maintenance, repair, at suporta sa operasyon sa loob ng bansa, na nagpapababa sa gastos sa operasyon at nagpapatatag sa patuloy na pagbili ng Maynila ng mga barko mula sa HHI. Ayon sa Korea JoongAng Daily, sinabi ng kumpanya na dalubhasa ito “hindi lamang sa pagbebenta ng mga barko bilang indibidwal na produkto, kundi bilang isang magkakaugnay na sistema” upang matiyak ang epektibong operasyon ng fleet.

Posibleng pagbili ng submarine at fighter jet

Pinag-iisipan din ng Maynila ang kauna-unahang pagbili nito ng submarine, na may budget na 110 bilyong PHP ($1.9 bilyon) para sa hindi bababa sa dalawang submarine. Sinusuri nito ang mga alok mula sa Naval Group ng France at isa pang South Korean contractor, ang Hanwha Ocean, ngunit binibigyang-diin ng HHI ang track record nito sa Philippine Navy. Ayon sa kumpanya, ang kanilang alok ay magbibigay ng mas mahusay na system integration at maintenance para sa kasalukuyang fleet.

Dahil sa tagumpay ng gawang-Korea na FA-50 sa mga operasyong kontra-terorismo sa Pilipinas, naging pangunahing opsyon ang KF-21 Boramae, isang mas malaki at supersonic na fighter, para sa susunod na proyekto ng multirole fighter ng bansa.

Hiniling ng Maynila na maihatid ang KF-21 sa pagitan ng 2027 at 2029. Na maglalagay sa Pilipinas bilang isa sa mga unang bansa na bibili ng fighter na ito mula sa South Korea, ayon sa iniulat ng South Korean outlet na Reportera noong unang bahagi ng Enero.

"Lamang sa presyo at kakayahan" ang KF-21 at maaari itong “i-upgrade upang maging stealth-compatible” sa hinaharap, na nagbibigay sa Maynila ng sopistikado at pangmatagalang pananggalang, sinabi ni Rhee Jae-kwang, analyst sa NH Investment & Securities, sa Korea JoongAng Daily.