Ayon kay Zarak Khan | 2026-03-23

Ganap nang pinagtibay ng Indonesia ang kasunduan para bumili ng BrahMos supersonic cruise missile system mula sa India, isang hakbang na itinuturing na bahagi ng mas malawak na pagsisikap ng mga bansa sa Southeast Asia na palakasin ang kanilang depensa sa baybayin at magsilbing matibay na panangga laban sa agresyon ng Tsina sa South China Sea.

Inaangkin ng Tsina ang mahigit 80% ng South China Sea bilang bahagi ng kanilang teritoryo, sa kabila ng pagbasura ng isang international court sa kaso nito noong 2016.

Ang pagbili, na kinumpirma ng tagapagsalita ng Ministry of Defense ng Indonesia na si Rico Ricardo Sirait, ay nagmamarka ng isang estratehikong pagbabago para sa Jakarta habang nilalayon nitong pangalagaan ang mga pangunahing rutang pandagat at palakasin ang kakayahan nitong magpakita ng puwersa sa buong kapuluan.

Ang Indonesia ang pinakamalaking archipelagic state sa mundo, na binubuo ng mahigit 17,000 isla at may saklaw na humigit-kumulang 7.9 milyong kilometro kuwadrado ng teritoryong pandagat.

Ang pagkuha ng mga BrahMos missile ay bahagi ng "pagsisikap ng Indonesia sa modernisasyon" ng kanilang sandata, lalo na sa depensa sa baybayin, at "palakasin ang kakayahang hadlangan at pigilan ang mga banta sa pambansang soberanya," ayon kay Rico sa Jakarta Globe noong Marso 9.

Dagdag pa niya, higit pang magpapatibay ang kasunduang ito sa strategic defense partnership ng Jakarta at New Delhi.

Ang planong pagbili ng Indonesia ay "sumasalamin sa di-tuwirang paglahok nito sa mas malawak na estratehikong kompetisyon sa pagitan ng mga bansa sa Southeast Asia at Tsina sa South China Sea," ayon sa ulat ng Asia Times noong Marso 11.

Inilarawan sa ulat ang Beijing bilang pinakamalaking banta sa seguridad pandagat ng Indonesia.

Mabilis at nakamamatay

Ang BrahMos missile, produkto ng isang joint venture ng India at Russia, ay itinuturing na isa sa pinakamabilis na supersonic cruise missile sa buong mundo.

Kung ikukumpara sa ibang supersonic cruise missile, ang BrahMos ay may tatlong beses na bilis, saklaw ng paglipad na 2.5 hanggang 3 beses na mas malayo, tatlo hanggang apat na beses na mas mahabang oras ng pagtutok gamit ang sensor, at siyam na beses na mas mataas na kinetic energy, ayon sa BrahMos Aerospace.

Kayang umabot ang missile sa bilis na hanggang Mach 2.8, halos tatlong beses na bilis ng tunog. Dahil sa bilis nito, mahirap ang pag-iwas o pagharang.

Pinabibilis ng India ang pagpapatupad ng extended-range na BrahMos missile, na may saklaw ng pag-atake na humigit-kumulang 800km, isang upgrade mula sa umiiral na 450km na bersyon, upang matiyak na ang conventional system ay ganap nang magagamit sa pagtatapos ng 2027, ayon sa mga opisyal ng India sa Times of India noong Oktubre.

Iniulat ng The Diplomat noong Marso 10 na maaaring ilunsad ang BrahMos missile mula sa iba't ibang plataporma sa lupa, sa dagat, o sa himpapawid.

Maraming mamimili

Ilang bansa sa Southeast Asia ang partikular na "interesado sa land- at ship-based na anti-ship na bersyon ng BrahMos, na pangunahing gamit ay pigilan ang pakikialam ng Tsina sa kanilang mga operasyong pandagat sa South China Sea," ayon kay Atul Kumar, fellow sa Strategic Studies Program ng Observer Research Foundation na nakabase sa New Delhi, sa isinagawang pagsusuri noong nakaraang taon.

Ang PIlipinas ang kauna-unahang bansa sa Southeast Asia na bumili ng naturang sistema. Lumagda ito sa isang kontratang nagkakahalaga ng $375 milyon noong 2022. Nagsimula ang mga delivery sa Manila noong Abril 2024, at dumating ang ikalawang pagpapadala makalipas ang isang taon.

Plano ng Philippine Marine Corps na magtalaga ng BrahMos coastal defense battery sa hilagang Luzon, kung saan itinuturing ang Luzon Strait at ang kalapit na Bashi Channel bilang mahahalagang rutang pandagat na maaaring hangaring kontrolin ng Tsina upang makalabas sa bukas na Pasipiko sakaling magkaroon ng krisis.

Ayon kay Kumar, kasalukuyang tinatalakay ang mga posibleng kasunduan na kinasasangkutan ng Vietnam at Indonesia. Samantala, sinusuri naman ng Malaysia at Thailand ang sistema.

Mga sagupaan sa N. Natuna Sea

Ayon sa pagsusuri ng 9DashLine noong Marso 2, itinuturing ng mga analyst ang pagbili ng Indonesia ng BrahMos bilang tuwirang tugon sa nagpapatuloy na tensyon sa North Natuna Sea, kung saan pumasok ang Chinese coast guard at mga barkong pangingisda sa Exclusive Economic Zone ng Indonesia noong 2019 at 2020, upang igiit ang "traditional fishing rights" ng Beijing.

May kahalintulad na mga alitan ang Tsina sa Pilipinas, Vietnam, at Japan, at iba pa, hinggil sa mga karapatan sa pangingisda at pagmamay-ari ng mga isla.

Nagpaigting ng tensyon ang mga insidente sa North Natuna Sea at nagbunsod sa Jakarta na magtalaga ng mga barkong pandagat at magprotesta sa pamamagitan ng mga diplomatic channel.

Isinasailalim ng Tsina ang Indonesia sa mga "grey-zone tactic ... pinagsasama ang mga aktibidad na sibilyan, maritime law enforcement, at diplomasya upang unti-unting palawakin ang impluwensiya nito nang hindi nag-uudyok ng hayagang tunggalian," ayon sa 9DashLine.

Bagama't huminahon ang mga sagupaan noong 2019 at 2020, "naging hindi gaanong lantad ang mga pagpasok ng mga barkong pangisda ng Tsina na suportado ng maritime militia at coast guard, ngunit hindi ito kailanman tumigil," dagdag pa sa ulat.