Ayon kay Shirin Bhandari | 2026-06-26

Maaaring maging ikapitong katuwang ng Pilipinas sa visiting-force agreement ang Germany at ang pangalawa mula sa Europa kasunod ng France, ayon kay Pangulong Ferdinand Marcos Jr., habang patuloy na pinalalawak ng Maynila ang network ng mga pakikipatulungan sa depensa sa buong Europa at Indo-Pasipiko.

Magiging bukas ang Pilipinas sa isang visiting-force agreement sa Germany kapag handa na ang dalawang pamahalaan, bagama't wala pang agarang planong pag-uusap, sinabi ni Marcos noong Hunyo 16 pagkatapos ng mga pag-uusap tungkol sa seguridad kasama si Pangulong Frank-Walter Steinmeier ng Germany sa Maynila.

Si Steinmeier ang unang pinuno ng bansang Germany na bumisita sa Pilipinas sa loob ng 63 taon.

"Sa gitna ng pabagu-bagong pangyayari sa mundo ng geopolitika ngayon, ang pinakamainam na landas tungo sa katatagan ay ang pagkakaroon ng mga pakikipagtulungan, at ang pagkakaroon ng malawak na base ng mga alyansa," sabi ni Marcos sa isang magkasanib na news conference kasama si Steinmeier.

May mga visiting-force agreement ang Pilipinas sa Estados Unidos, Australia, Japan, New Zealand, France at Canada, na nagbibigay ng legal na balangkas sa mga dayuhang sundalo para sa pansamantalang mga pagsasanay-militar sa bansa. Ipinagbabawal ng konstitusyon ng Pilipinas sa mga dayuhang sundalo na magtayo ng mga base o magsagawa ng mga aktibidad-militar sa bansa nang walang aprubadong kasunduan.

Papel ng Germany sa Indo-Pasipiko

Ang pagbisita ni Steinmeier ay sumasalamin sa lumalaking pakikipag-ugnayan ng Germany sa usaping seguridad at ekonomiya sa buong Indo-Pasipiko.

"Ang sitwasyon sa South China Sea ... ay patuloy na nagiging tensiyonado, at nagbibigay iyon sa amin ng dahilan upang mabahala," sabi ni Steinmeier, ayon sa Associated Press, na binabanggit ang kahalagahan ng ekonomiya ng Indo-Pasipiko.

Nagdadala ng trilyong dolyar ang South China Sea sa pandaigdigang kalakalan taun-taon at isa sa mga pinakaabalang ruta ng kalakalan sa dagat sa mundo.

Ang mga paglabag sa internasyonal na batas pandagat ay naglalagay sa panganib ng kalayaan sa paglalayag at "dahilan ng malaking pagkabahala sa Europa," sabi ni Steinmeier, at idinagdag na ang kamakailang pagsasara ng Strait of Hormuz ay nagbigay-diin sa mga panganib na iyon.

Nangako si Steinmeier ng patuloy na suporta ng Germany para sa Philippine Coast Guard, ang front-line force sa mga engkwentro ng bansa sa mga barkong Tsino sa South China Sea.

Nagpasalamat si Marcos kay Steinmeier sa suporta ng Germany sa 2016 Arbitral Award, na nagpawalang-bisa sa pag-angkin ng Tsina sa mahigit 80% ng South China Sea sa ilalim ng United Nations (UN) Convention on the Law of the Sea (UNCLOS). Hindi lumahok ang Beijing sa arbitrasyon at tinanggihan nito ang desisyon.

Ang Germany ang ika-12 pinakamalaking katuwang sa kalakalan ng Pilipinas noong 2025, na may kabuuang halaga ng kalakalan na $5.39 bilyon.

Hindi bababa sa 40 kompanyang German ang may operasyon sa Pilipinas, habang mahigit 45,000 Pilipino, karamihan sa kanila ay mga nurse, ay naninirahan sa Germany.

Pagtutulungan sa ekonomiya

Ang pagbisita ay nagresulta sa isang kasunduan sa pag-upa na nagkakahalaga ng milyun-milyong dolyar sa pagitan ng Lufthansa Technik Philippines at ng Bases Conversion and Development Authority upang magtayo ng isang 157,000-metro kuwadradong aircraft maintenance hub sa Clark.

Inaasahang magbibigay ng trabaho ang pasilidad sa humigit-kumulang 1,200 manggagawa kapag nagsimula na ang operasyon nito sa 2028.

Sinabi ni Gary Ador Dionisio, isang propesor ng political science sa De La Salle-College of Saint Benilde sa Maynila, sa South China Morning Post na ang kasunduan ay "magbibigay ng seguridad sa ekonomiya para sa Pilipinas at magsasanay sa mga Pilipino sa mga espesyalisadong industriya" habang sumasalamin din ito sa lumalaking pagsasanib ng pag-unlad ng ekonomiya at estratehikong seguridad sa Indo-Pasipiko.

Ang Clark, dating base-militar ng U.S., ay bahagi ng Luzon Economic Corridor, isang inisyatiba sa imprastruktura ng Pilipinas, U.S. at Japan na nag-uugnay ng mga pamumuhunan sa mga sentro ng komersiyo, transportasyon, at industriya.

Ang pamumuhunan ay nagpapatibay sa lumalaking papel ng Clark bilang sentro ng ekonomiya at estratehikong gateway sa loob ng Luzon Economic Corridor.

Ang kasunduan sa kooperasyong pandepensa na nilagdaan ng Maynila at Berlin noong nakaraang taon ay sumasaklaw sa cybersecurity, mga armas, lohistika, at mga operasyon sa pagpapanatili ng kapayapaan ng UN. Nagbibigay ito ng balangkas para sa anumang visiting-force agreement sa hinaharap.