Ayon kay Jia Feimao | 2025-07-04

Makalipas lang ang bukang-liwayway ng isang araw ng tag-init noong nakaraang taon, higit sa 30 imbestigador mula sa Ministry of Justice Investigation Bureau (MJIB) ng Taiwan ang nagtipon sa labas ng Taipei at naglakbay pa-timog sa iba’t ibang bahagi ng tech hub ng bansa.

Eksaktong alas-siyete ng umaga, sa isang sabayang operasyon, kumatok sila sa mga pintuan, iniabot ang mga search warrant, at sabay-sabay na pumasok sa mga bahay at opisina.

Hindi mga drug trafficker ang mga target kundi walong inhinyero na tahimik na nagtatrabaho para sa isang kumpanyang Chinese ng semiconductor na nakapasok sa Taiwan.

Ang raid ay bahagi ng malawakang operasyon noong Agosto na may code name na "Project 1022 Wolf Hunt," na iniutos sa ilalim ng pamumuno ni dating Pangulong Tsai Ing-wen upang ibunyag ang ilegal na pang-aagaw ng China sa mga Taiwanese na eksperto sa chip sa pamamagitan ng mga pekeng kumpanya.

Tuloy-tuloy pa rin ang paghihigpit.

Noong Marso, inilunsad ng MJIB ang pinakamalaking operasyon nito laban sa ilegal na pang-aakit ng China sa mga talentong teknolohikal ng Taiwan, nagpadala ito ng 180 ahente upang salakayin ang 34 na lokasyon na konektado sa 11 kumpanyang Chinese -- kabilang na ang Semiconductor Manufacturing International Corporation (SMIC), ang ikatlong pinakamalaking chipmaker sa buong mundo.

Inusisa ng mga awtoridad ang 90 indibidwal kaugnay ng mga alegasyong gumamit ang mga kumpanya ng mga pekeng kumpanya upang palihim na mag-recruit ng mga lokal na inhinyero at ilipat ang teknolohiya pabalik sa China, ayon sa pahayag ng MJIB noong Marso 28.

"Ang high-tech na industriya ng Taiwan ang gulugod ng aming ekonomiya, kasama ang mga kumpanyang semiconductor at mga kaugnay na industriya na nagsisilbing 'National Protective Shield' ng bansa," ayon sa MJIB.

"Dahil dito, ang high-tech na talento ng Taiwan ay naging pangunahing target ng pangre-recruit ng mga kumpanyang Chinese.”

Mahahalagang manggagawa

Ang mga inhinyero ng semiconductor ng Taiwan ay matagal nang nakikita na susi para maiangat ang sektor ng tech sa China.

"Ang mga inhinyerong ito ay hindi lamang mahalaga sa paggawa ng 'Chinese chips' kundi sila rin ay nagsisilbing isang breakthrough point para maiwasan ng Beijing ang tech blockade ng US," sinabi ng imbestigador ng MJIB na may apelyidong Su, na dalubhasa sa pagsisiyasat ng iligal na pangre-recruit ng mga kumpanyang Chinese sa Taiwan, sa Focus.

Ang taktikang ito ay nakatulong sa mga kumpanyang Chinese na makaiwas sa mga parusang ipinataw sa sektor ng high-tech ng China, bilang bahagi ng mas malawak na pagsusumikap na pahinain ang dominasyon ng Taiwan sa mga semiconductor.

Ang interes ng Beijing sa talento ng semiconductor ng Taiwan ay tumaas matapos ang pagpapakilala ng "Made in China 2025," isang industrial policy ng China na inilunsad noong 2015 para iangat ang sektor ng pagmamanupaktura ng bansa.

Nanatiling pangunahing pang-akit ang mataas na sahod, kung saan ang ilang kumpanyang Chinese ay nag-aalok ng suweldo na numerikal na kapantay ng sahod sa Taiwan -- pero sa Chinese yuan binabayaran, kaya apat na beses ang laki ng kita.

Parami nang parami ang mga kumpanyang Chinese na nagpapahintulot sa mga inhinyero na magtrabaho nang remote mula sa Taiwan, kung saan ang mga resulta ng kanilang pananaliksik at pag-develop ay direktang ipinapadala sa mga server ng mga punong-tanggapan ng mga kumpanya sa China.

Ang mga kumpanyang ito ay madalas na nagkukunwaring mga kumpanyang Taiwanese, dayuhang negosyo o mga overseas Chinese-funded venture para maitago ang kanilang tunay na pagkakakilanlan.

Halimbawa, noong Marso, inakusahan ng Taiwan ang SMIC -- ang pinakamalaking tagagawa ng chip sa China, na nasa ikatlong puwesto sa likod ng TSMC at Samsung sa taunang kita -- ng paggamit ng shell company na nakarehistro sa Samoa upang magbukas ng sangay sa Taiwan at makapang-recruit ng talento.

Ipinaparatang na nilabag ng Shenzhen Torey Microelectronics ang mga regulasyon upang makapagtayo ng mga di-opisyal na site, habang ang Clounix ay unang nagparehistro bilang isang “kumpanyang may kapital mula sa Taiwan” bago nagpalit ng pangalan bilang isang kumpanyang mula sa Singapore upang magsagawa ng ilegal na pagrerekrut.

Karamihan sa mga operasyong ito ay suportado ng Integrated Circuit Industry Investment Fund ng China -- o mas kilala bilang "Big Fund" -- o subsidiya mula sa pambansa at lokal na pamahalaan ng China. Tinuturing ng Beijing na estratehiko ang halaga ng mga kumpanyang ito sa kanilang layuning manguna sa teknolohiya.

Ang pagkuha ng mga dayuhang inhinyero ay kadalasang pinakamabilis na paraan upang makakuha ng mga kritikal na teknolohiya para sa mga kumpanyang Chinese, sinabi ni Paul Triolo, isang kasosyo sa DGA Group, sa Wall Street Journal noong Nobyembre.

"Ang mga gobyerno ngayon ay mas pinahahalagahan ito," aniya ngunit kanyang binanggit na ang pagtukoy sa linyang namamagitan sa legitimate hiring at illegal talent poaching "ay isang napakahirap na gawain at mahirap ipatupad."

'Isang nakikinitang kalakaran'

Upang kontrahin ang banta, binago ng Taiwan ang pitong batas at 14 na regulasyon sa nakalipas na apat na taon, kabilang ang isang malaking rebisyon ng National Security Act -- na minsa’y nakatutok lamang sa mga espiyang Chinese.

Noong Disyembre 2023, pinalawak ng pamahalaan ng Taiwan ang listahan ng mga ipinagbabawal na i-export, idinagdag ang 10 pang “core national technologies” tulad ng mga third-generation semiconductor at disenyo ng mga AI chip -- dagdag ito sa naunang listahan ng 22 teknolohiya na, kapag tumagas sa mga itinuturing na kaaway ng estado, ay maaaring magresulta sa hanggang 12 taong pagkakakulong.

Binago ng gobyerno ang Act Governing Relations Between the People of the Taiwan Area and the Mainland Area para higpitan ang pangangasiwa sa mga cross-strait talent flow at maiwasan ang technology leaks.

Nakikipagtulungan ang gobyerno sa industriya ng semiconductor para bumuo ng mas malakas na network ng depensa -- nagpo-promote ng kooperasyon sa pagitan ng akademya at industriya, proteksyon sa mga lihim ng kalakalan, mga counterespionage effort at pagbabahagi ng intelligence sa mga international partner.

Samantala, pinalalakas ng mga awtoridad ang kamalayan ng mga inhinyero at nag-aalok ng mga retention incentive para maprotektahan ang teknolohikal na kalamangan ng Taiwan.

Gayunpaman, sa kabila ng mas mahigpit na mga parusa sa ilalim ng kamakailang mga legal amendments, hindi bumaba ang bilang ng mga paglabag – at ang mga taktika sa pangre-recruit ay lalo pang naging patago.

Isang Taiwanese na imbestigador na may palayaw na "Brother Hui" ang nagsabi sa Focus na alam ng maraming inhinyero na alanganin sa batas ang kanilang mga aksyon, at tinuturuan pa nga ng mga Chinese manager ang mga empleyadong Taiwanese kung paano tumugon kapag may mga pagsalakay ang mga awtoridad.

Sa ilalim ng kasalukuyang mga batas, ang mga inhinyero ay karaniwang nakalista lamang bilang mga saksi, habang ang mga parusa ay ipinapataw sa mga ehekutibo ng kumpanya.

“Magkakapareho ng wika at pinag-ugatang kultura ang dalawang panig ng Taiwan Strait. Hindi titigil ang Beijing sa pag-target sa mga talentong Taiwanese -- isa itong malinaw at inaasahang kalakaran,” ayon kay Brother Hui.

[Bahagi II ng II sa isang serye sa Tech Security Push ng Taiwan]