Ayon kay Wu Qiaoxi | 2026-07-16

Inaprubahan ng isang komite ng Senado ng U.S. ang panukalang batas sa depensa na magpapalawak sa isang inisyatibang pangseguridad na nakatuon sa Taiwan upang isama ang Pilipinas, na sumasalamin sa pagsisikap ng Washington na palakasin ang panrehiyong depensa at kakayahang makapigil sa pag-atake sa buong "first island chain."

Kabilang sa "first island chain" ang Japan, Taiwan at Pilipinas.

Inaprubahan ng Senate Armed Services Committee noong Hunyo 11 ang draft nito ng National Defense Authorization Act para sa fiscal year 2027. Papalitan ng panukalang batas ang Taiwan Security Cooperation Initiative ng First Island Chain Security Cooperation Initiative at palalawakin ang saklaw nito. Bukod sa Taiwan, isasama rin nito ang Pilipinas kapag naisabatas.

Itataas ng panukalang batas ang awtorisadong ayuda sa seguridad mula $1 bilyon tungo sa $1.5 bilyon (na paghahatian ng Taiwan at Pilipinas) para sa fiscal year 2027 at palalawigin ang inisyatiba hanggang 2032. Kailangan pa itong pagtugmain sa bersyon ng Kamara at lagdaan ng pangulo ng U.S. bago magkabisa.

Ang awtorisasyong ito ang magiging pinakabagong bahagi ng pondong pangseguridad ng U.S. para sa Pilipinas, kasunod ng $2.5 bilyon ($500 milyon kada taon sa loob ng limang fiscal years) na inaprubahan sa ilalim ng Philippine Enhanced Resilience Act noong Disyembre, ayon sa USNI News.

Itinuturing ng Tsina na bahagi ng teritoryo nito ang Taiwan at mayroon itong maraming alitang pandagat at pangteritoryo sa Pilipinas.

Tugon ng Taiwan

Sadyang isinama ang Pilipinas upang palawakin ang kooperasyong panrehiyon, hindi upang isantabi ang Taiwan o bawasan ang papel nito, ayon kay Taiwanese Deputy Defense Minister Hsu Szu-chien noong Hunyo 17.

Malakas ang suporta sa Kongreso mula sa magkabilang partido para sa seguridad ng Taiwan, kabilang ang bilyun-bilyong dolyar na nakalaang ayuda, ayon kay American Institute in Taiwan Director Raymond F. Greene sa panayam sa United Daily News ng Taiwan noong Hunyo 23.

Nagkakaisa ang Estados Unidos at mga kaalyado nito sa Indo-Pacific na kailangan ang mga hakbang upang mapalakas ang kakayahang makapigil sa pag-atake at mapanatili ang katatagan ng rehiyon, sinabi ni Greene.

"Sa ilalim ng National Security Strategy ng U.S., kailangan nating makipagtulungan sa mga kaalyado sa rehiyon upang mapanatili ang status quo sa buong first island chain at mapigilan ang anumang tangkang agawin ang Taiwan sa pamamagitan ng puwersa," aniya. "Ipinadadala rin ng Estados Unidos sa Indo-Pacific ang pinakabagong kakayahan nito sa depensa habang pinalalalim ang pakikipagtulungan sa mga kaalyado."

Nakareserbang suplay

Nakasaad sa panukalang batas ang pagtatatag ng isang war stockpile para sa Taiwan. Bagama't wala pang inilalabas ang Washington na mga detalye ng pagpapatupad nito, inaasahang magiging katulad ito ng mga kaayusang ginagamit para sa Israel at Timog Korea.

Layunin ng mga programa para sa war reserve stock na mapanatiling may sapat na suplay ang mga puwersang kaalyado hanggang matugunan ng lokal na produksiyon at karagdagang suplay mula sa labas ang mga pangangailangan sa panahon ng digmaan, ayon sa ulat ng USNI News, na binanggit ang U.S. Defense Security Cooperation Agency.

Ang mga kasalukuyang stockpile ay naglalaman ng mga bala, sasakyang militar at kagamitang medikal na nagkakahalaga ng bilyun-bilyong dolyar para magamit ng mga puwersa ng mga bansang kinaroroonan ng mga ito, mga kaalyado at ng Estados Unidos sa panahon ng krisis.

Ipinakikita ng panukala ang pangamba sa dami ng mga kagamitang pandigma na maaaring magamit sa isang sigalot sa Tsina at sa hirap ng pagbibigay ng karagdagang suplay sa mga puwersa sa malawak na Indo-Pacific, ayon sa USNI News.

"Malaki ang maitutulong nito sa kakayahang makapigil sa pag-atake," sinabi ni Mark Montgomery, retiradong rear admiral ng Hukbong Dagat ng U.S. at senior fellow sa Foundation for Defense of Democracies, sa Central News Agency ng Taiwan.

Aniya, ipinahihiwatig nito sa Tsina na maaaring gamitin ng Taiwan ang mga nakareserbang kagamitang militar ng U.S., bukod pa sa sarili nitong mga armas, upang labanan ang anumang pananakop.

"Ang mahalaga ay nakaimbak na sa Taiwan ang lahat ng suplay at bala na nais nating ilipat doon," sabi ni Montgomery.

Madalas magsagawa ang Tsina ng mga pagsasanay na kinabibilangan ng sea denial at mga operasyong pagharang sa karagatan, at makatutulong ang mga nakaimbak na stockpile ng U.S. sa Taiwan upang mapanatili nang mas matagal ang kakayahan nitong ipagtanggol ang sarili, ayon kay Lin Ying-yu, associate professor sa Graduate Institute of International Affairs and Strategic Studies ng Tamkang University.

Panrehiyong depensa

Inaatasan din ng panukalang batas ang Pentagon na suriin ang mga pagkaantala sa pagbebenta ng mga armas sa Japan, Taiwan, Timog Korea at Pilipinas, at suriin kung paano naaapektuhan ng mga ito ang kakayahan ng first island chain na makapigil sa pag-atake.

Hiwalay pa rito, inaatasan ng panukalang batas ang Pentagon na bumuo ng estratehiya sa pamamahala ng krisis sa South China Sea. Isa ang South China Sea sa mga pinakapinagtatalunang lugar sa kanlurang Pasipiko sa nakalipas na dalawang dekada.

Lalong naging mapuwersa ang mga hakbang ng militar ng Tsina sa South China Sea mula noong 2022, ayon sa USNI News. Umabot sa sukdulan ang tensiyon noong 2024 matapos ang mga komprontasyon sa Second Thomas Shoal at Sabina Shoal.

Kumilos ang Tsina upang bawiin ang lupa at magtayo ng mga pasilidad sa Scarborough Shoal, na nagbunsod sa pagpapadala ng mga karagdagang puwersang pandagat ng Pilipinas at U.S. sa lugar, ayon sa ulat.

Obligado ang Estados Unidos sa ilalim ng Mutual Defense Treaty ng 1951 na tumulong sa Pilipinas kung magdudulot ang mga aksiyon ng Tsina ng pagkamatay ng mga sibilyang Pilipino, marino o mga miyembro ng sandatahang lakas.

Ipinakikita ng mga pagbabagong ito na unti-unting isinasama ng Washington ang Taiwan sa mas malawak na estratehiya para sa first island chain na "magsusulong ng mas malalim na kooperasyon at mahalagang interoperability" sa pagitan ng Estados Unidos, Japan, Taiwan at Pilipinas, ayon kay Rupert Hammond-Chambers, pangulo ng US-Taiwan Business Council.